சில கவிதைகள்
வார் தளர்ந்த உள்ளாடை
எப்போதும் ஜூம் அழைப்பில் முதலில் அவரே பேசத் தொடங்குகிறார்
இடைநிறுத்தி எங்கும் மீண்டும் மீண்டும் பேசுகிறார்
உள்ளோடும் பதட்டத்தை எதோ ஒரு சொல்லால் மீண்டும் வெளிப்படுத்துகிறார்
எப்போதும் தளர்ந்த உள்ளாடை
முதலில் போடும் போது சரியாக நிற்கிறது
பின்னர் நடக்கும் போது
காலுக்குள் அதுவும் என்னுடன் நடக்க ஆரம்பிக்கிறது
அப்புறம் சிறு பிள்ளை போல் மூடிய கதவில் முட்டி நிற்கிறது
அதன் பின் அங்கேயே பிள்ளையாய் உறங்கி விடுகிறது
வார் தளர்ந்த உள்ளாடை உள்ளே இருப்பதால் ஒரு சௌகரியம் இருக்கிறது
பின் தேவைப் படும் போது இடம் மாற்றினால் போதும்
வெளியில் வார் போட்டு இறுக்க வேண்டாம்
அடிக்கடி புதுப்பிக்கத் தேவையில்லை
எதோ உள்ளே இருக்கிறது என்று அமைதி கிடைக்கிறது
இது போல் எல்லாம் நாம் முன்னரே செய்திருக்கிறோம்
உங்களில் நம்பிக்கை இருக்கிறது என்று சொல்லி முடிக்கிறார்.
வார் தளர்ந்த உள்ளாடையும் வராது காண் நம் வழிக்கே !
Date: 19 June 2025
வானின் கீழ் இரவை எதிர்பார்த்தல்
செவ்வானம் பின்னிருக்க
கட்டபொம்மன் சிலை முன்னிருக்க
ஒரு செருப்புத் தைப்பவர்
நடக்கும் ஆட்களுக்கு வழிவிட்டு
ஒரு கருப்பு நூல்கண்டு
ஒரு வெள்ளை நூல்கண்டு
ஒரு குத்தூசி
ஒரு முனைக்கத்தி முன்னிருக்க
தலையில் பையுடன்
உறங்கிவிட்டார்
இன்னொரு எவரோ ஒருவர்
காலமாய் நிற்கும்
மதுரை கோட்டைவாயிலில்
சுவர் பார்த்து
நடப்பவர் யாரையும் பாராமல்
ஒரு பாலிதீன் பையில் மூன்று இட்லி
ஒரு காகிதப் பொட்டலத்தில் கையளவு வறுத்த வேர்க்கடலை
தலைவைக்க கைப்பை
இரவுக்காக சுவர் பார்த்து காத்திருக்கிறார்
காயம் ஆகாத தீ
காலில் தெறித்த
எண்ணெய்ப் பொக்களங்களுடன்
நாள் முழுதும் வேலை செய்து
ஓய்ந்து உட்கார்ந்தாள் அம்மா
'உஸ்.. அப்பா சண்முகா
வலியுள்ள சுடலைத் தீ ஏன் எனக்கு இப்போது ?
வலியற்ற சுடலைத் தீ போதாதா?'
Date: 15 June 2025
பூ தூரம்
பெங்களூக்கும் மதுரைக்குமான
தூரம் என்பது
பேருந்தில்
மல்லிகைப் பூ
நீண்டு
ஆடும்
தலைகள் தான் இல்லையா ?
Date: 15 June 2025
ரிமோட்டின் மொழி
தான் ஊரில் இல்லாமல் போனால்
நியூஸ் பேப்பர் பால் போக
கேபிள் இணைப்பையும் நிறுத்திவைத்து இருப்பாள் அம்மா
திரும்ப வரும் வழியில்
போனில் அழைத்து முதலிரண்டையும் மீண்டும் வரவைக்கிறாள்
ஆனால் ஒவ்வொரு முறையும்
கேபிளின் மொழி மாறிவிடுகிறது
அதில் பத்தாயிரம் சானல்கள்
ஒரு மாபெரும் அடுக்கு மாடிக் கட்டிடம்
சில நூறு ப்ளாக்குகள்
பல நூறு மாடிகள்
உள்ளே பல நூறு வீடுகள்
ஒவ்வொன்றாய்த் தேடித் தேடி
அறிமுகம் செய்ய வேண்டியிருக்கிறது
தேச உலக மொழிகளில்
பரிச்சயமான மொழியின் வார்த்தைக்காக
அலைய வேண்டியிருக்கிறது
கதவு எண் போன்ற நிறைய நான்கு இலக்க எண்களை
நினைவில் வைக்க வேண்டியிருக்கிறது
போனமுறை திறந்திருந்த நிறைய கதவுகள்
இம்முறை சாத்தப்பட்டிருக்கின்றன
வேண்டுவது எப்போதும் தூரத்திலும்
வேண்டாதது கையிலும் சிக்கி விடுகிறது
எப்போதும் ஊர் பரிச்சயமாகும் போது
ஊரை மாற்ற வேண்டியிருக்கிறது
Date: 19 June 2025
கேட்பவர் இருக்குமிடத்தில் கேட்காமல் இருப்பது
நான் இது போதும் என்று சொல்லும்போது
அவர் எப்போதுமே இன்னும் வேண்டும் என்கிறார்
இப்போதும் உனக்காகத்தான் கேட்கிறேன் என்கிறார்
உன்னால் கையிருப்பில் பிழைக்க முடியாது என்கிறார்
கேட்காதவன் என்றும் ஏமாளி என்கிறார்
நாகரிக உலகம் என்பது இன்னும் கேட்பது தான் என்கிறார்
பார் எல்லோரும் கேட்டுக்கொண்டே இருக்கிறர்கள் என்கிறார்
கேட்பவர்கள் இல்லாமல் கொடுப்பவர்கள் ஆகுமா எனக் கேட்கிறார்
உனக்குக் கீழே கேட்பவர்கள் எவருமே இல்லையா எனக் கேட்கிறார்
சுருங்கி வெற்றிடமாவாயா இல்லை விரிந்து வான் தொடுவாயா என்கிறார்
முனிவனில் ஜனகனும் வீரனில் துரோணனும்
என்றுமே விதிவிலக்கு என்கிறார்
இன்னும் உன்னால் சிறிதாவது கேட்க முடியவில்லையானால்
நான் சொல்வதையே திருப்பிச் சொல்
அதுவும் முடியவில்லையானால்
இப்போது நீ எனது வழியை மறித்து நிற்கிறாய்
சரி ,இவ்விடத்தை தயை கூர்ந்து காலி செய் என்கிறார்
Comments
Post a Comment