Translate

ஒரு யாசித்தல்

-
ஒரு யாசித்தல்
------------------ 



என்னுடைய நடைபாதையில் எனக்கு அது முக்கியமான இடம். நான் இருக்கும் இந்தச் சாலை பத்து வருடப் பழக்கம். சாலையே இல்லாமல் இருந்த காலம் தொட்டு, இப்போது இரண்டு வழிச் சாலை வரை. வழியில் ஒரே ஒரு டீக்கடை. ஐயங்கார் பேக்கரி. நானே பார்த்து எத்தனையோ கை மாறியிருக்கிறது. இப்போது எதிரில் ஒரு காம்ப்ளக்ஸ் வந்திருக்கிறது. கிழக்கே இருக்கும் கடையைப் பார்த்து முப்பது அடி உயர ஆஞ்சநேயர் சிலை இருக்கிறது. கடைக்குப் பின்னால் ஓடும் சாலையில் இறங்கினால் கோபசந்திரா கிராமம். சுரைக்காய் , திராட்சைத் தோட்டங்கள் பார்க்கலாம். அதுவே எனது வழிப்பாதை.

நான் இங்கே போகும் மாலை வேளைகளில் , எதிர் நிற்கும் புளிய மரத்தின் பின்னால் முழு வானமும் தெரியும். இதைத் திரும்பச் சொல்லிக்கொள்ள வேண்டியிருக்கிறது. இந்த இடத்தில் இருந்து பார்த்தால் தொடுவானம் வரை விண்முட்டும் கட்டிடங்கள் எதுவும் சூரியனுக்குக் குறுக்கே வராது. எல்லாம் தாண்டி பொன்னொளி புளியமரத்தில் விழும். இலைகள் நுனிகளில் தளிர் ஒளி கொள்ளும்.

நாளில் ஓரிரு முறையேனும் இங்கு வந்து போவது என் வாடிக்கை. தலை பின்னிக்  கொண்டை முடிந்த பையன் பல வருடங்களாக டீ மாஸ்டராக இருக்கிறான். நான் லெமன் டீ கேட்டவுடன்  கொடுத்தால், மகிழ்ச்சியாக இருக்கிறான் என்று பொருள்.  பெரும்பாலும் ஹத்து நிமிஷா ஆகுத்தே என்பான். இல்லை என்று அர்த்தம். 

இந்தப் பகுதிகளில் கிரிக்கெட்  மைதானங்கள் கட்டி வாடகைக்கு விடுகிறார்கள். புல் தரை மேயப்பட்டது. இரவு விளக்குகள் உண்டு. வார இறுதிகளில் கூட்டமாக விளையாடிவிட்டு இளைஞர்கள் இந்தக் கடையில் தான் இளைப்பாறுவார்கள்.

இன்று நம் குண்டு டீ மாஸ்டர் பையனுக்கு வேலை கெடுபிடியாகி விட்டது. சிலர் சக்கரையில்லாமல் கேட்டனர். சிலருக்கு சக்கரை அதிகம். காப்பி, டீ க்கு நடுவில் பழங்களைத் தோல் உரித்து ஜூஸ் போட வேண்டியிருத்தது. பால் பாக்கெட்டை வெட்டி மில்க் ஷேக்குகள் ஆக்கினான். பாலைப் பிரித்து கொதிக்கும் பால் போகினியில் தளும்பும் வரை  ஊற்றினான். வால் பாத்திரத்தை வைத்து பாலை டீயென, காப்பியென மாற்றினான். 

கிரிக்கெட் விளையாடிக் களைத்த பையன்கள் ஏக்கமான முகங்களுடன், தங்கள் கோப்பைக்காக காத்திருந்தனர். அத்தனை குத்திய கண்களும் அவன் கைகளைப்  பார்த்தபடி இருந்தன. அந்தக் குறுகிய  சமையலறையின் உள்ளிருந்து இரண்டு சுவர்களில் டம்ளர்களை நிரப்பிய படி இருந்தான். யாசித்த கைகள் அவற்றை எடுத்து முலைப் பாலென உறிஞ்சின.

யாராவது ஒருவர்  டம்ளரை எடுத்துக் குடிக்க விலகியதும்,  அந்த வெள்ளைப் பெண் நாய் எதிர்பார்ப்பில் மெதுவாய் ஓடி அவர் அருகில் வந்தது. அதன் குட்டிகள் போட்டு அப்போது ஒட்டிய வயிறு உள்ளேயும் வெளியேயும் போய் வந்தது. வற்றி உலர்ந்த பால் மடி அலை போல் அசைந்தது. அருகில் போய் ஓரிருமுறை வாலை ஆட்டி அண்ணாந்து பார்த்தது. அவருடன் ஓரிரு அடிகள் எடுத்து வைத்தது. ஒன்றும் ஆகாது என்று தெரிந்ததும் அடுத்து டம்ளரை எடுப்பவரிடம் ஓடியது. 

நான் நின்ற அரைமணியும் ஆர்வம் குன்றாமல் கண்களில் நம்பிக்கையுடன் யாசித்தது.  

கடைசியில் ஒருவர் ஒரு பன் வாங்கி அதன் எதிரில் போட்டார். அதுவும் ஒரு அன்னையின் பால் மடி என்றே தோன்றியது. 

இன்றும் நேற்றைப் போல் பகல் புழுங்கி மாலையில் மழை பெய்ய ஆரம்பித்தது. விண்ணின் துளிகள் இறங்கி வந்தன. மண் உதடு கூப்பிக் குடிக்க ஆரம்பித்தது.


Comments

Post a Comment

Popular posts from this blog

தோல் பாவைக்கூத்து- ஒளியின் கலை - 1

-
Image
தோல் பாவைக்கூத்து - ஒளியின் கலை  ============================== சில வாரங்கள் முன்னர் இப்போது நாங்கள்  குடியிருக்கும் வளாகத்தில் ஆச்சரியப்  படவைக்கும் வகையில் தோல் பாவைக் கூத்து ஒன்றை ஏற்பாடு செய்தார்கள். குழந்தைகளுக்கு கட்டணம் இல்லாமல், பெரியவர்களுக்கு சினிமாக் கட்டணத்தை விட குறைவாக நுழைவுக் கட்டணம். புகழ் பெற்ற தோல்பாவைக் கூத்துக் கலைஞர் பத்மஸ்ரீ .திரு ராமச்சந்திர புலவர் குழுவுடன் இதை நடத்துகிறார் என்று படித்தேன். அவருடைய விக்கி பக்கத்தை மேலோட்டமாகப் பார்த்து, தமிழ் விக்கியின் தோல்பாவைக் கூத்துப் பக்கங்களையும் மேலோட்டமாய் கடைசி நேரத்தில் படித்துப் பின்னர் , அந்த இரண்டு மணி நிகழ்வை பார்த்து முடித்து , இன்னும் ஆர்வம் மேலெழுந்து , அ.கா.பெருமாள் அவர்களின் தென்னிந்தியாவில் தோல்பாவைக் கூத்து என்ற நூலையும், அதற்குப் பின் அவர் கொடுத்த குறிப்பின் வழியே Stuart Blackburn எழுதிய Inside the Drama House என்ற புத்தகத்தையும் படித்து, இன்னும் சில இணையப் பக்கங்களை மேய்ந்து, காணொளி சில பார்த்து முடித்து , இதை தொகுத்து  எழுதி வைக்க ஆர்வம் வந்து பின் வரும் சொற்களை எழுதுகிறேன். ராமச...
Read more

பாராவின் எழுத்துப் பட்டறை - அனுபவக் குறிப்புகள் -1 - பாரா என்ற கதைசொல்லி

-
Image
ஒரு பெரிய எழுத்தாளர் வகுப்பு எடுப்பது அரிது. அதிலும் எப்படி எழுதுவது என்று அவர் சொல்வது. எட்டு நாட்களில் இருபத்திநாலு மணி நேரமாக. நாளுக்கு மூன்று மணி. பத்துப்பேர் இருந்த வகுப்பு.  அதனால் முடிகையில் அவரே எல்லோரையும் பேர் சொல்லிக் கூப்பிடும்படி தனி வகுப்பாக ஆகிவிட்டது.எனக்கும் ஒரு எழுத்தாளரிடம் நீண்ட நேரம் அருகில் இருக்கமுடிந்தது இப்போது மட்டுமே. அவர் எழுதும் அறையில் இருந்து வகுப்பை எடுத்தார் என நினைத்தேன். இருக்கையின் பின்னால்  ரமணரின் படம். 'நீ என்ன செய்தாலும் உலகில் ஒன்னும் ஆகாது, எனவே தைரியமாய்ச் செய்'  சத்வ குணமுள்ள சிற்பமாய் அந்தப் படம். அதன் பின்னால் எதோ ஒரு சித்தர்.  எப்போதாவது பாட்டில் திறந்து நீர் குடிப்பார் , ரெண்டு நிமிஷம் என்று என்றாவது எழுந்து செல்லும் இடைவெளி. மற்றபடி கதை ,கதை பெரிய கதை சொல்லி என்று முதல் வகுப்பில் முடிவு செய்தேன். சொல்லிய புத்தகத்தை திடீரென எழுந்து எடுத்துக் காண்பித்தார் (எளிய தமிழ் இலக்கணம்). குறிப்பு எடுப்பது முக்கியம் என்று தன்னுடைய டயரிக் குறிப்பை திறந்து காண்பித்தார். தினமும் ரமணரை வணங்கி வகுப்பு ஆரம்பிக்கும். 'கலை என்பது வெளிப்பாட...
Read more

தோல் பாவைக்கூத்து- ஒளியின் கலை, ஆவணப் படுத்துதல் - 2

-
Image
தோல் பாவைக்கூத்து- ஒளியின் கலை, ஆவணப் படுத்துதல்   - 2 (  தோல் பாவைக்கூத்து- ஒளியின் கலை - 1  ) இன்றைக்கு இந்தியாவிற்கும் அமெரிக்காவிற்கும் மேல்மட்டத்தில் பேசப்படும் உருட்டல் மிரட்டல்கள் நடுவில் Stuart Blackburn போன்ற ஒருவரை தெரிந்து கொண்டால் அடிமட்டத்தில், ஆழத்தில் என்ன நிகழ முடியும் என்று தெரியும். இவர் அமெரிக்காவில் பிறந்தவர், 1984ல் முதலில் கேரளத்தில் தோல்பாவைக் கூத்து நிகழ்வொன்றைப் பார்க்க வருகிறார். அப்போது அடுத்த பத்து வருடங்கள் அந்த ஆராய்ச்சி தன்னை இழுத்துக் கொள்ளும் என்று தெரியாது என்கிறார். 1970ல் இருந்தே நாட்டார் கலை ஆராய்ச்சிக்காக தமிழகம் வந்திருக்கிறார்.  இந்தப் புத்தகம் ஒரு நாவல் போல விரிகிறது. இந்த நாட்டார் கலையைத் இவர் பார்வையில் விரிகிறது.  இவர் பார்க்கப்போகும் முதல் நிகழ்வுக்கு புகழ்பெற்ற பாவைக் கலைஞர் கிருஷ்ணன் குட்டியுடன் டாக்ஸியில் சுகவரம் என்னும் ஊருக்கு செல்வதில் ஆரம்பிக்கிறது.இது இரவில் மட்டுமே நடப்பது, எத்தனை இரவு கண்முழிக்க வேண்டுமோ என்ற நினைப்பு இவருக்கு. பகவதி கோயிலின் அருகில் இருக்கும் கூத்து மாடம் இவருக்கு பெரிதாகப் படவில்லை. ...
Read more